تجلس متوتره على الشازلونج ..تضم ساقيها كتشبث اخير بفتات ما .. جسد تلاعب به الهزال ليكون مرتع لكل ما هو حزين ..خاتم زواج باهت فقد بريقه من مدهكحل موضوع بلا عنايه .. احمر شفاه احمر داكن وكانه دليل انها لازالت انثى
..............
انا اسمي عفت ... عفت بنت راضيه ...
مش بحس براحه وانا بقول اني عفت عبدالرحمن ... "تتنهد" اصل انا مش عفه حد !
تحب تسمع ايه ؟؟! .. حاجه تضحك و لا حاجه تبكي ... يعني عندي حاجات مسليه اللي انت تحبه
= طفولتك ؟!
عادي يعني ... زي اي طفله بتحب تلعب بالعرايس و تلبس جزمه امها .. و تتكعبل و تقوم تلبسها تاني .. و البس طرحه الصلاه على انها طرحه فرح ... مش عارفه مستعجله ليه
يوم كنت لابسه جزمه زي العاده مش على مقاسي .. بس المره دي كانت عاليه .. عاليه أوي
وقعت اتعورت و لجل الحظ تمرضني جدتي ..
=وبعدين ؟! فين المشكله ؟!
"تندهش و تتسع حدقه عيناها أوسع ما تكون" .. المشكله يا دوك اني كنت ست سنين .. ست سنين بس !
=و هما الست سنين مبيتعوروش ... ؟!
كنت فاكره انهم مبيطاهروش !! .. كنت فاكره اني هاقوم و العب تاني واقع و اقوم ...
بس ستي قالت ان الاوان .. و ان عودي باينوا هيبقى فاير .. و ان مينفعش نستنى لا ميتقدرش عليا ... تفتكر ايه الي اوحالها بده .. لون الدم مثلا ؟!
= و بعدين .. .!
ستي وعدتني انها هتعملي شوربه الارنب اللي بحبها .. اكمن امي مابتطقش ريحتها .. و هتجبلي كوز عسل من اللي بحبه .. لو سمعت الكلام و خصوصا كلام أبله حكمت .. الممرضه !!! ... و اه انا كنت مستعده اعمل اي حاجه قدام اغراءات كوز العسل ..
جت حكمت ... زي القضا المستعجل ... و هنا تبتدي تسال نفسك ليه الناس دي مبتتاخرش في السكه زي اي حاجه بنستناها ليه "مستعجل" ... تفتكر ايه الحكمه ؟!
مطولش عليك .. قماشه بيضه ع الفخد ده و اختها ع الفخد التاني .. و أمي حضناني .. مش زي كل مره لجل الامانه .. كان حضن من اللي بيوجع .. و يكسر الضلوع .. حد فينا كان موجوع .. و التاني هيتوجع ..
"سنِ موسك يا حكمت ... عاوزينها تشرفنا" .. عمري ما عرفت هشرفهم ازاي .. هلعب بالعروسه اكتر و لا هبطل شقاوه .. و ازاي هبقى عروسه .. و ليه ابقى عروسه ما شريفه بنت عمي عروسه .. و انا عندي عرايس كتير في الدولاب .. ليه أنا ..
=بتضحكي و تعيطي ؟؟! ما تركزي ف حاجه واحده
اصل انت سمعت الدراما كلها .. تسمع بقى اللي يضحك ! اللي يضحك اني و اخيرا عرفت ف اليوم ده ليه ماما مابتكلش الارانب ... وليه ريحته كانت بتقلب كيانها .. و ليه كانت رجليها مضمومه دايما زي قضبان السجن .. و ليه جالها السكر من كتر عياطها عليا .... و ليه سموها راضيه .
موس حكمت علِم ف عقلي ... عارف لما الدكتور بيقطع الحبل بين الام و الجنين ... موس حكمت رسم حبل اقوى بين راضيه و عفت ... حفر طريق مامنوش رجوع !
"اللي اتبتر ما يتصلحش" ... و اللي اتحفر مامنوش مفر .. بس الطريق ده بيضيق كل يوم
يتهيألي في يوم انه هيكون .. قبر
.................
اخذت تنكمش تنكمش حتى اصبحت في وضع الجنين ... ترتعش اصابعها لتخطئ مكان دموعها في كل محاوله يائسه للتماسك .. من يعلم .. قد اضرب الرقم القياسي في الاستشارات الزوجيه يوما ما .. التي تحكي عن كل ما لا يخص الزوجيين ! .. تلملم اشلائها و روح جرحه سلاح بارد بعينين تائهه و كانها تبحث عما اخذ منها عنوه .. كم رغبت ان اقول لها .. ان تصرخ و تكسر ذلك الحذاء الانيق ... و لكنني اكتفيت باخبارها عن موعدنا القادم ...
ترحل و تجر خلفها اذيال من الحنق و الغضب ... و الخيبه !
ليست هناك تعليقات:
إرسال تعليق
ها ايه رايك ؟؟؟ :)