إسكندريلا - الحرية من الشهداء

إسكندريلا - الحرية من الشهداء

my collage is my utopia world ... 
where u see equality between men and women 
and u see heroins everywhere :D 
there is no impossible ... in our collage :) 
music , books , events and #symposium ♥

and where u can leave ur mob. and money then u find it as they are :P :P :D

حوار من خيالي ... مالوش علاقه بالواقع

الابن : انا سمعت انا الجنه دي حلوة اوي .. هي بعيده اوي يا ماما مينفعش نركبلها حاجه

الام : لو انت فضلت شطور و بتشرب اللبن و بتاكل اكلك .. في يوم هيطلعلك جناحات و تطير

الابن : يوووووووه لسه هشرب اللبن ده طعمه وحش .. بيقولوا في الجنه الاكل هناك احلى

الام : كل حاجه هناك احلى

الابن : يعني هتلاقي ابن احلى مني ؟؟

الام : لا طبعا .. مفيش ابن احلى منك

الابن : انا عندي فكره انا هاقول لعمو سواق الاتوبيس بتاعنا .. يجيبلنا اتوبيس كبيييير نسافر بيه كلنا الجنه

وياخد الناس الشاطره ... و كده مش هاشرب اللبن

" اكيد يا ماما في اتوبيسات بتروح الجنه "

يا بلد لسه الكلام محشور في الحلق … 
موتي فيكي اسهل من الولاده و الطلق .. 
اتفو عليكي كفرت بيكي … 
امبارحك زي بكراكي مفيش بينهم اي فرق

قاموا بالواجب

كل منا كتب “تويتات ” والبعض بكى 
و الاخر يشجب و يدين 
و نحزن .. نصرخ .. يعتصرنا الالم 
نشعر باننا نحترق … يدهسنا الياس 

لقد اخطأ اللاعب تصويبته 
لقد اخطأ الهدف 

معذره … لم اقصد اهداف براعم صغيره دهست صباحا و لم نجف دمائها الدافئه 
و لا عقول تناثرت على الطريق … كانت تحمل طموح 
او كراسات تملؤها الرسومات و الخطوط المعوجه 

انني اقصد اهدافكم … و النعم التي تتميزون بها عن اهاليهم 
نعمه النسيان 

لقد كفرت بكِ وطناً

انها اللعنه

كانها لعنه نوفمبر تحل علينا كل عام لعنه شهداء لازالوا معلقيين في السموات .. ينادوا اخرين لا يستحقوا اللعنات التي ستحل علينا ... كل نوفمبر

ميت

اللي راكب القطر ميت و اللي راكب اتوبيس ميت … و اللي يصدق ان الحال هيتغير بكره يموت من الضحك

اوعاك

يا اتوبيس المدارس ..

يا معدى على المستقبل …

هاتلي معاك طموح …

و ولادنا اوعاك تقتل

رماد

هما الطلبه … و احنا الحداد .. هما بكره .. و احنا سواد .. حلم بكره .. اصبح رماد

علّي الصوت

يا فقير هتموت ع المزلاقان .. او هتموت جعان … علّي الصوت … و موت من الشجعان

واجب وطني

الموت علينا احنا حق … وواجب وطني … و شويه حاجات تانيه

اسمك

سمع اساميهم صم …

اوعاك تنسى في يوم الدم …

مين يعرف و لا يتخيل ..

يمكن اسمك يوم ينضم

اقتل

اقتل اكتر في الاحلام ..

سوّد اكتر في الايام ..

مره حداد مره سواد ..

املي في بكره بقى اوهام

#اسيوط

دم الطفل اللي راح … اه لامؤاخذه ده كان فلاح

انا اولى بيه

يا مصر
لو مصره
تموتي ابني …
موتييه في حضني …
يمكن يبكي 

امسحله الدموع ..
او يمكن يجوع ..
يمكن يشتاقلي ..
بلاش يموت موجوع
مطلبتش كتير
لا طريق امن
و لا امشي مامن
و لا في طريقي
طلبت رجوع
اصلي ضنايا
لو بس معايا
اخبيه جوا الضلوع

لو لسه عاوزه تاخديه
خديه !!
بس اوعاكي
ع السكك ترميه
و لا تقطعي
في لحمه
و تدفعيلي
كام جنيه
لا طلبت منك تبكيه
و لا تشتريه
لكن مش من حقك
تفكري انك
تبيعيه
او تقتليه

لو مصره تقتليه
مدي ايديك
جو قلبي
و طلعيه
و لو تنسيه
كل ام
جوه منها
صورة ليه
لبسمه كانت
يوم بتنور عينيه
اوعاكي تقولي
حبتيه
اومال لو كنتي
بتكرهيه
كان حصله ايه
و لا ايه
يا مصر
لا انتي امه
و لا ولدتيه
اوعي في ترابك
تداريه
لو سمحتي
انا اولى بيه

صبحيات

صباح بيلف في شوارعك …. 
صباح غرقان في بحورك .. 
و لا عمره في يوم لاوعك … 
برغم غرورك و جنونك ..

:)

صبحيات

صباح الحريه يا ساده … 
و حلمين تلاته و سعاده 
من غير لف و لا دوران … 
صباح طموحه بزياده .. :)

فلسفه ... شوارعجيه

مرة واحده في المترو ... 
طلعت من باب " الصعود" 
و نزلت من باب "النزول" 

مستحملتش الصدمه انها التزمت .. ماتت !!

#كوكيات

ليه لما اكون باب من غير كالون 
تكون انت دولة من غير تيليفون 
 و رغم بشاعه الجريمه 
 لكن مبيعاقبش عليها اي قانون

كوكيات

جوه في عقلي لما تفوت
ابني بيت بمبي صغنطوط
بس لو تفكر تسالني 
يقع البيت في بحر سكوت

#لحظة_تجلي

كل ما احتاجه .. مقعد في صفوفكم الاولى 
حتى ادرك انني خارج المشهد .. 
و ان لحظات السعاده ما هي الا حبكة دراميه 
و لكنني لست بلا دور 
فدوري دائما ان اصفق لكم 
اما اليوم …
ان اصفق لحظه سقوط الاقنعه 

#لحظة_تجلي

حصان سبق
و من المحال
اتخلق
لكن الغناوي
جوه حلقه
بتتخنق
و اما عجّز ..
اتحرق

حصان سبق
اسطورة مالها.. زي
و اللي اتحرق
حاجه جوه عيونه 
بيقولوا عنها .. ضي 
جنونه انه يترمي 
في احضان همومه 
فيموت م 
الزهق 


 كام حصان .. بيموت 
لا طال عنب و لا توت 
و العمر يفاجئه 
يفوت .. 
اسرع من الخيّال 
تحت مسمى 
و اللي سبق 
اكل النبق


اوعاك تموت 
حصان سبق .. 
لا عمره عافر
و لا سافر 
و لا عاش حياته 
ما داق 
غير النبق 

#خيالات_كتاب_تراب_الماس

كتاب .. لاحمد مراد 
يداعب خيالي و يستفزه :) 
ورقه .. قلم .. من نوع marker لوني المفضل 
ليخلد كلمات قد تلتصق بالذاكره الي الابد 
و موسيقى في الخلفيه .. صوت مارسيل خليفه 
يهدهد هذا الخيال ... ويطوف معي في طرقات الروايه 
حتى يدندن .. حنفي و الست ليلى .. 
و قاطني درب النصير .. و حارة اليهود و الخرنفش 
نرتشف سويا ... قهوة بالحبهان 

طماعه ان تخيلت صباح اكثر مثاليه :)

#موسم_كسر_الاصنام

حقيقي مالوش لازمه تدوني اسم انا مش هاستخدموا في المستقبل 
يعني جوزي يقول عليا الجماعه .. 
و ولادي شايفيين ان اسم مامتهم سر حربي لا يمكن الافصاح عنه O.o 
و لو حصل و الناس عرفتوا .. يا ويلتااااااااااااااااااااااااااااااااااااه :(
العار العار العار 

عزيزي القارئ .. القارئه … 
لو كان اسمي مابيعبرش عني .. اكيد كنت ممكن تندهلي اللي ماتتسماش 
لكن انا .. انسانه و من حقي يكون اسمي مش عيب 

انا خلود بنت نجوي … و نفس البنت هي خلود بنت سعد :) 
و الاتنين دوول مش حاسيين باي اشمئزاز او عار تجاه اني بنت … 
و مقتنعين ان انا استحق اتنادى باسمي 

و لا حبيتوش :)

كان يا ما كان 
كان ولهان 
عشقان 
هيمان 
يكره مر القهوه 
يشربها 
عشان ما ينام
يسرح مره 
ف لونها 
عشان في عيونها 
شرقان 
فطسان 
غرقان
و اهو من يومها 
سهران 
سرحان 
تعبان 
و ان يوم 
يوصف في جمالها
بيقولوا عليه 
فلتان  
و لا يعرفوش 
عن اللي شربوا
قهوة 
و لا ناموش .. 
و اللي حبوا 
القمره 
و لا طالوش 
اعذروا الغلبان 
اصلكوا 
و لا حبيتوش :) 

#ان .. كان صديقك كتابا

تبا لكتاب .. 
ياخذك لتحلق في السموات .. و تلمس السحاب الذي يشبه “غزل البنت”.. 
او نوراه قطن .. 
في ايدي صبيه سمراء ذات غمازات
و اشعه شمس .. لا تحرق لا تؤذي .. لا تشتعل 
لكنها دافئة مثل احضان الجدات .. في الاعياد 
و تستطيع عيناك ان ترى سكان ذلك النجم .. ” البرتقانه” 
وهم اشخاص حميمون .. دافئون 
يقومون بواجب الضيافه فيقدمون .. فنجان قهوة 
و كعك مكوب .. و كرسي هزاز 
و منظر يطل عل البحار .. 
و مصابيحك ما هي الا مجموعه شمسيه 

و حين تقلب صفحته الاخيره … 
تجد نفسك سجينا لقانون احمق يدعى الجاذبيه … 
تسقط صريعا فوق ارض كئيبه سوداء عفنه .. بارده كبرود الموت ذاته ..
يسير فيها احياء اموات .. يسمونهم بشرا و يسمونها ارض الواقع 
و صوت اخر صفحات الكتاب جرسا يصرخ معلنا ميعادك 
لتتكور مثل ورقه خريف ارهقها العمر في ركن زنزانتك ..منتظرا .. 
حتى ياتيك كتابا اخر من ارض
ارض لم يطأها ياس او ملل .. او خجل .. 
ارض لم ترها بعد و لكنك تعلم حتما بوجودها .. 
تبعث لك بدليل وجودها ليتسلل من تحت باب الزنزانه .. 

فستعلنها صريحه 
ساحلق .. 

القاهرة

القاهرة .. 
ذات العيون الساهرة 
و الجروح الغائرة 
و العمال ذوى القلوب 
الحائرة 
و النقاشين .. و المحتاجين 
ع البياعيين و البنايين 
و ايام كتير .. 
عدت سنيين 
ع السقايين 
يسقو العمار .. و الانتظار 
لسهره صباحي 
حتى طلوع النهار 
بقلوب مش مستعجله 

و بعد انتظار ..
جاء القرار .. 
ستغلق عيناها 
تلك الفاتنه 
و تعلق ابوابها .. 
الساحرة 
و تظلم الاجواء .. 
و اعلم انها 
ليست مدينه فاضله
و لكنها .. 
رزق بيوت 
لعمال ماتطولش
سحتوت !!

بعد الاطاله في وصفها 
تلك العابثه القاهرة 
المزعجه على حد قول 
المدعيين 
و خارج حسبان .. 
المسئوليين 
استعدوا يا ساده 
لموجه من المتسوليين 
صباحا مع الجائلين 
لان القرار 
ان تنام .. الدكاكين 
و تصحو .. الملاهي 
و الملاعيين 
و تنام القاهرة 
في القرن الواحد
و العشرين 
اضبط ساعتك يا عامل . 
و انت يا عم 
اسماعين 
نعم … تنام
ع العاشرة … 

شدوا اللحاف .. 
نام و لا تخاف 
عزيزي .. كلنا 
نائمون 

صبحيات

صباحك مزقزق ..
و قلبك يدقدق ..
و اللي تحبه … 
يحبك و يصدق

صبحيات

صباح عايق وفايق.. 
شايف نفسه كده و رايق ..
ولو ترسم التكشيره …
يجي ينكشها في دقايق :)

صبحيات

صباح بيلف في شوارعك .... صباح غرقان في بحورك .. و لا عمره في يوم لاوعك ... برغم غرورك و جنونك ..

:)