شخابيط

شخابيط .. لاخبيط
 افكاري تعباني
 بتتنطط ع الحيط
 و دماغي وجعاني
 و كلامي ده عبيط
 لا انا نايمه و لا فايقه
 و لا اصلا متضايقه
 و انا عامله فيها رايقه
 و اللي مجنني ..
 اني بكدبني
 و انت تصدقني
 ال عامل … مش فاهم
 و بتعملي حويط :)

 koka

^__^

رغم الغيوم انا لسه شايف ..
 صباح البسمه ع الشفايف ..
 اصل بكرة لابد منه ..
 ربك بيكرم .. و لا انت خايف ؟؟!

 #فلسوفيات

سطور :)

نفسي اكون زي كتابك
 ملازمه دايما لجنابك
 و تقراني ما بين السطور
 و لا يطولش عليا غيابك

 koka :D
 صباحكم مفهوميه .. ما بين السطور

#احنا :)

‎#هنفضل_دايماً_المجتمع_اللي فاكر انه متدين بطبعه
 #هنفضل_دايماً_المجتمع_اللي اللي بيكسل يجيب جورنال بس ممكن يقرا مع اللي جمبه في الميكروباص
 #هنفضل_دايماً_المجتمع_اللي بيكون مصمم يسمع الناس كلهم على ذوقه من موبايله الصيني
 #هنفضل_دايماً_المجتمع_اللي بيشتم عى المجتمع و هو اصلا جزء منه
 #هنفضل_دايماً_المجتمع_اللي بيقول كل سنه و انت طيب من غير اي مناسبه

 بس برده هيفضل نفس المجتمع اللي يشوف كل ده .. و يفضل فيه :)
 اللي يضحك على همه ..
 و يقدر يكون ساخر وسط المسخرة ... و ساحر في زمن المر و الشحورة
 هيفضل ايو بسمه معانده على شفايفه ... و عينيه مش راضيه تغمض ..
 رافضه تبطل تشوف ... لحد ما تموت
 و ايدين من خشونتها ... متبته في الدنيا .. و من رقتها بتطبطب على نفسها
 في وقت الشده

 و لما تقول احنا العسل الاسود .. يقولك و ماله ده السماار نص الجمال ..
 و النص التاني عسل :)
 koka

اللهم اجعله خير

اللهم اجعله خير ...

 لما اكبر و اكركب .. مش هزعل و مع كل تجعيده في وشي
 هفتكر بيها قصه من القصص الكتييير اللي شوفناها سوا .. هحفر جوا كل خط
 ذكرى .. كان فيها دمعه .. بسمه مش فارقه كتير المهم انها ذكرى معاك

 لما يجيلنا الزهايمر ... و نتقابل كل يوم و نتعرف من اول و جديد
 و الغريب .. ان انت تختارني و انا اختارك من اول و جديد

 لما ناكل الايس كريم مش عشان دي اكتر حاجه كنا بنحب ناكلها سوا ..
 لا عشان مبقاش عندنا سنان اصلا

 لما نتخانق و نزعق .. و تعمل مش سامعني .. قال ايه سمعك تقل
 اينعم هو تقل .. بس انا عارفه انك بتحب تمثل برده عشان الخناقه متزيدش

 لما تتريق على المشيه بتاعي اللي بقت اشبه بمشيه البطريق
 و نفضل نضحك نضحك
 لحد ما نكح نكح .. و اقولك يا راجل يا مكحكح كفايه ...
 اللهم اجعله خير
 تقولي متخافيش ... مش هنعجز اكتر من كده ...
 مفيش اسوء من كده

 بس عارف بقى الاسوء ...
 مجرد التخيل اني مش هكبر وياك ...
 ده اسوء بكتير

 by : koka

ايوة انا !!!!

ايوة انا البنت اللي بتحب الحبهان في القهوة و مش بتحبوا في الشوربة :)
 #قهوة_الصباح

 koka

سكر زيادة

صباحكم سكر زياده ..
 و على الفرح مظبوط ..
 و احلامكم بالالوان او ساده ..
 تتحقق و من غير شروط

 koka

انا عيله !!

ايوة انا البنت اللي بتقعد في محطه المتر و تستنى الباب يقفل
 .. و اعمل للناس باي باي .. و اضحك :)
 مش يمكن يكون يومهم كان صعب ...
 و يمكن يكونوا محتاجين البسمااايه دي زي حالاتي كده :)

 ايوة انا ... عيله :) في حاجه ؟؟!

 koka

حلم

كل اللي بحلم بيه موسيقى عاليه و دوشه ... تغطي على صوتي و انا بصرخ
 و زحمه ما اتكسفش و انا بطنطط في وسطهم
 و لحظة فرحة انسى فيها كل اللي انا فيه
 رغم اني متاكده انها بعد ما اللحظه دي تخلص
 كل حاجه هترجع لحالها

 بس احتياجي للحظه دي ... حلم بينسيني كل اللي انا فيه ^_^

 koka :)

صباحكم طرب ..
 و الضحكه تحت الطلب ..
 و الهم اللي زي الوطن ..
 تاه عننا و اغترب
 #فلسوفيات

فتفوته

في فتافيت سكر في حياتنا ..
 رغم ان الفتفوته دي حاجه صغنتوته .. الا انها بتخلي الحياة مسكره
 زي قهوة الصبح مع كلمتين من عمك سيد درويش و لا الشيخ امام

 بس ساعات الفتافيت بتدوب في الزحمه .. و نسال نفسنا !!!
 يا ترى ليه مبقيتش اقرا ميكي :) .. و كمان بنسى احط رز للعصافير
 مبقتش اعرف اعيط لما هنادي بتموت ... و كانها .. عادي ..
 ما حاجات كتير بتموت !!
 مبقتش اكلم نفسي قبل ما انام ... و كاني خايفه منها
 و بتجنبها !!

 و تفضل الفتافيت تتسرسب ورا بعضيها ... لحد ما سالت نفسي ؟؟!
 هو انا ازاي كنت بضحك ؟؟!
 نسيت الضحكه ازاي كانت بتطلع

 اوعوا تسيبوا فتفوته تضيع منكم ...
 احسن حياتكم تتبعتر و ميبقاش فاضل منها غير فتفوته ...
 و حتى دي مش بعيد تنساها

 koka