طظ

صباحكو "طظ" ..
و اللي مش عاجبه
"يفز" ...
يا اللي ساكت ثور ...
دمك عليهم ما يعز
اخرج عن القاعده
و شذ !!!
صرخه منك تزلزل
كلمه منك تهز
فتح عنيك ..
اتامل حواليك
قول .. غور
زور القبور
مات اللي مات
و العمر فات
و رغم الدم
قالولك .. "طظ"

هو ليه مبقيناش نكتب جوابات ؟؟

نفسي حد يكتبلي جواب في ظرف ملون … 

بحس ال
“mails” و ال “chat” 
بارديين اوي … مفيهمش روح 

بحب الخطوط … 

اللي لو مال تعرف دي كان سببها
فرحه و لا زعل …و لا كسوف و لا تردد
او حتى النقط اللي في طرف الجواب ...
و انت بتخبط القلم مش عارف هتقول ايه
و لو القلم وقف ع الورقه من الحيره .. تحسها 

طب تعرفوا اني بقيت اكره صوت تكتكه الكيبورد ... و كان حد بيتكتك في دماغي بحسها تكتكه برد .. برود ... فراغ ... او حد تايه في الضلمه فبيخبط !!!

حتى الايميلات مالهاش ريحه !! انما الورق .. ممممم ريحه و لو .. حتى الظرف اهتمام 

بحب صوت القلم و هو بيشق طريقه في الورقه ... صوت حنين ... 

او المجهود اللي بنبذله عشان يكون خطنا حلو ... و مفيش
"auto-correct" ... هيخلينا مثاليين ... خطوط ملعبكه ...
غلطات املائيه .. مش فارقه

انا هابعتلي جواب !!!
و اي حد عاوز جواب هابعتله جواب

ممكن بقى تبعتلي جواب ؟؟؟!

koka