مواطن !

مواطن 1 : نام و اتهنى

مواطن 2 : لسه متعلق في السموات

مواطن 1 : طب و الجنه !!

مواطن 2 : مين قال طريقها مفروش بسكات

مواطن 1 : و احلامنا

مواطن 2 : قول ... ثور و اتمنى ................خلي الحلم يدوق طعم الانفلات

مواطن 1 : تعرف ايه انت عن الجنه ؟؟!

مواطن 2 : اعرف انه وطن مفيهوش تبرير ..............و الفقير فيه فقير ضمير

مواطن 1 : كلام انشا مالوش معنى

مواطن 2 : جنتي مفيهاش تكفير

مواطن 1 : انا هستنى

مواطن 2 : عادتك و لا هتشتريها ... تموت في التاخير

و الحياه ايه غير صبا و رصد و اصفهان بتنتهي بنهاوند

في حب المزيكا ... 

إحكيلى عن أول لمسة إيد

لما اتقالي
"" إحكيلى عن أول لمسة إيد ""

هي اللي بتبدي بالسلام .. عادي يعني زي ازيك ؟؟
 اللي بتبقى كلام كتير مبيتقالش !!!
زي الحوارات الكتير اللي بتبقى نفسنا تطول …

زي "اللمسه" , و انتوا بتعدوا الطريق
او و انتي بتديه قلم بدل اللي تملي يضيع !!
  
هي الخوف و الفرحه و الدفا اللي في وسطه لسعه برد 
 هي “غزل بنات” للبنوته ام ضفيرتيين 
شويه كسوف لونهم احمر على الخدود … متعه لمده ثانيتين!! 
هووووووووب غزل البنات …داب زي القلوب
زي الثواني زي اي حاجه بتدوب !!!

زي عمرنا .. اللي بيبتدي بس
مع اول لمسه 

امتى بتعرف ؟؟!

امتى بنعرف ان في حاجه جوانا اتكسرت !!!

في الواقع احنا مبنعرفش :)
غير لما ندور عليها ... و نلقيها قطعت ميه و نور
مدغدغه جنب بؤره الذكريات ...
اللي ما بتصدق تطلع و انت بتحاول تنساها
اللي دايما تيجي على بالنا
في الوقت الغلط و قبل النوم ... او و انت بتغلي اللبن عشان يفور !

او لما كبريائنا يطب على فجأه
بالظبط زي الامهات لما نكسر حاجه 
فنلملمها و نقول 
“مش انا”  !!!

^____^

بضحك بصوت عالي !!
اه ... بضحك عادي يعني ...
و انا باضحك باعلى صوت عندي
ده مش معناه اني مبسوطه ..
ده معناه ان احيانا بدل ما بتصرخ
.. بتضحك … تضحك … تضحك
يمكن عينيك تدمع بالغلط … و محدش يقول عليك بتعيط

صندوق خشب

صندوق مليان 
مليان غضب
و دموع عتب
فيك ذكريات مكسره 
و حاجات تانيه مسكره 
و مرايه صورتي فيها 
متغيره
 و ضحكه مش م القلب 
مش صافيه .. متعكره 
شكلك خشب 
لكنك تذكره 
لزمن فاتني هنا 
متمسمره 
لا عارفه اطير
و لا عارفه حتى 
اكون انا 

 قدري كده … 
يفوتني محبوبي 
جوه صندوق الخشب 
من غير وداع 
و لا حتى 
فرصه عتب او حتى جرافيتي
بدمنا سوا انكتب
سابني .. جوه 
الخشب 

الاحياء الاموات ... الاموات الاحياء
"العائدون من محمد محمود"

مكتوب

مين قال ان القلوب 
مكتوب عليها
بس تدوب 
انا م النكد
قررت اتوب
هو صحيح 
مهواش مكتوب 
ع الجبين 
؟غير بس الذنوب
مكتوب عليها 
فارقنا كام 
محبوب
و اللي القلب 
اليه ميال 
ومن اول غنوه 
لاخر موال 
و لما كنت فيك 
احتار .. 
مكتوب عليه 
كل احتمال
بس متقولش 
القدر 
هو صحيح مكتوب 
لكنه شئ محجوب
يعني الفراق 
كان اختيار

الصناديق قالت

و الصناديق قالت …
سيبوني فحالي … 
انا مبشيلش ورق .. 
انا شايله عمر اتسرق .. 
انا التابوت 
جوايا مليون
الف صوت 
و انتم عايشيين 
ع السكوت
و الصوت المكبوت … 
انا النجاه
لواحد حس بزهق 
ساعه الغرق

باكوره اعمالي

https://soundcloud.com/koka-kassab/3w4thmdjquyt

واحد انتوخ

قالوا عليهم
شيوخ 
واللي يسمعهم 
يدوخ 
و ده اخره شيخ منصر 
و نسيوا ان المنظر 
بسببهم ممكن 
يبوخ 
قالوا عليهم دعاه 
و اللي اتبعهم
ضاع و تاه 
و ان قولت اي اعتراض 
كلامك يبقى 
مطبوخ 
جبنه “نستون” 
و حوارات .. 
و اللي بيستخبوا
في حارات 
و اللي يتزنق 
في كلمه 
يقول الدين 
يا حضارات 
على كده .. 
انا واحده حاقده 
و الشعراوي .. 
ده اصله فلته 
و اللي مابيشتمش 
النهارده !!!
يبقى معجزه زمانه 
و اللي غلطوا 
دول مش مرضى 
ده اسمه واحد انتوخ 
لساك بتقول “شيوخ”

د. على جلال الكاشف و الغروب

وقت الغروب
الشمس مش عاشقه الهروب
الشمس بتسيبنا هنا
و تروح هناك تفتح دروب
إن كان هناك ولا هنا
هيطولنى حبه من الهنا
قلبى يا الطير العنيد
الشمس مهما تروح بعيد
راجعه و لو فاتت سنه

د.علي جلال كاشف لما اتكلم عن الغروب 
حسيت ان الشروق اتظلم 
فقولت اكتب عن الشروق :)

وقت الشروق 
الشمس دي مش بس ضوء 
الشمس حبه دفا 
تفوت ف قلبك بالهدوء 
و لو ضحكك اختفى 
هيوصّل للفرح اللي اتنفى 
قلبي يا الطفل الصغير 
الشمس مهما من القمر تغيير 
يفضل حب شروقها ف قلبي انا 

كوكيااات 
#جوانيات

التلجه المجروشه

عارف الضحكه المرعوشه 
ضحكه كدابه و مقفوشه 
اه بالعافيه بتطلع مني
مش اصليه و لا مغشوشه 
اهي حاجه بتعبر عني 
مش نكديه و لا فرفوشه
و ف وسط الازمات
و بلملم كل الحاكايات
اه بضحك و برقص و بغني 

عارف الضحكه المرعوشه
تشبه للتلجه المجروشه
عليها هدوء و برود
لكن مكسوره و مدشوشه
زي الطريق المهدود
في السكه القصه منقوشه
لو تقراها تعرف عني
بضحك دايما و لكني
الهم في دمي موجود


عارف الضحكه المرعوشه
لا هي عاقله و لا مروشه
اصلها واقعيه بسلامتها
بصوتها الناس مدوشـه
و لا نعرف ايه في نيتها
تشبه الماسه المخدوشه
لو اللي بيتوه بيعود
و تتحقق كل الوعود
ترجع فرحتها الملطوشه

ايوه انا التلجه المجروشه

#جوانيات #فلسوفيات

ليه ؟

صباحكم مش عارفه ايه ؟؟
صباحكوا ليه ؟؟
صباحكوا تايهه !!!! … 
قوموا هاتوه من ايديه
قولوله لا تبعد بعيد ..
ولا تتمادى في التهديد 
اينعم مانتش سعيد .. 
لكنك الحل الوحيد 
عشان بكره يجي 
وبعده يجي 
و اموت كل ليله 
من جديد 
و مش بعيد اتولد
اه في حجر امي 
اصبح وليد 
و مابينك و ما بين المسا 
اشب و ادب 
اكره و احب 
اتحب ؟؟ 
انسى و اتنسى 

لكنك صباح
و نرجع نقول .. صباحنا ليه ؟؟
صباحي مش عارفه ايه ؟؟

#جوانيات #فلسوفيات

ورد

ورد جوه الكتاب 
لا انا فاكره 
محبه و لا عتاب 
لكنها نشفت من كتر التفكير
ماتت و انتهت من كتر التبرير 
و هنسى لو حتى فاكره 
هاكدب لو لسه قادره 
هاثبت لجنابك 
انك فاشل في الحساب 
انا كل شئ مقفول 
كل شئ مسئول 
انا موسوعه مش كتاب 
ده شئ مينفعش فيه 
العتاب

#جوانيات #فلسوفيات

مات و اتخلق

حياتنا ايه 

غير شويه

ورق ..
و عمر اتسرق
و دم لونه
… اتحرق
و سواد شربناه
لحد الغرق
واللي ماداقش الرصاص

..اتفلق 

و اللي طالب بالقصاص
بغازكم اتخنق
و اللي اتحمق
و اللي جاع .. ضاع
و اللي تاه ..
و مبقاش فيه الرمق
و اللي قال الظلم .. مر
مش بعيد يكون
اتشنق
و اللي قاعد
بردو مات
م الزهق
و اخر نقطه
في سم الكربه
و العيشه غي بلدنا
وطن و لا تربه
تشبه كتير للغربه
اما دمي و اخر نقطه
انكتب عليها تتدلق
ما هو مش غريب
من الليلادي
هيبات في حضن امه
جوا ترابها
مات .. و اتخلق

koka

 #جوانيات #فلسوفيات #محمد محمود

فنون

يتعلمون فن الرقص .. العزف .. الكتابه .. ليتجنبوا عالم ما !!!
اتعلم فن الابتعاد … و الاحاديث البارده
عدم الاشتياق … و تضميد روحي المعذبه
في صمت .. في ابتسامه .. في تنهيده ترتدي ثوب الارتياح
لابتعد عن
عالمـ”كم

عزيزي … كلها فنون !!!

#جوانيات

صباح

صباح المحروسه بنت حلوه بضفاير ..
و اللي هواها لسه هايم و حاير ..
فين اللي غنوا باسمها ايام عزها ..
اللي ماتوا في حبها اصحاب ضماير

طريقك

طريقك لو تملي فاضي .. 
وانت لا راضي تطاطي .. 
اعرف انك مش وحيد .. 
شمس بكره اهيه قصادي

koka

#جوانيات

رهن اشارتك

حريتي .. مش رهن اشارتك 
حريتي .. مش ملك ايديك
تعليمي ده سلاحي لبكره 
كان مرفوع ضد اعاديك 
بس الصوت .. مات بسكوت 
و عدالتي ماتت في عنييك 
اما العيش .. خلينا جاعنين 
بس مش هختار معاليك 
جوّع اكتر .. زود اكتر 
بكره اتغدى و افطر انا بيك

عاوزه حر !!

عاوزه حر
وفرله براح و عيش 
خليه يتنفس يعيش 
و هو طير ..يعرف يطير 
من غير جناح
و لا حتى ريش
و لو ان طعم
فرصكم مر
لسالك بتقول
انا عاوزه حر 

عاوزه حر 
وفرله عداله اجتماعيه 
نادي بالتعلييم و التوعييه 
و هو القرار من قلب المرار 
اجبار و اقتدار
اسمها بردو حريه 
و لو ان تعليمكم 
يشتت يضر 
لساك بتقول 
انا عاوزه حر 

عاوزه حر 
وفرله راي و صوت 
يكسر وحش السكوت
وهو لما نتكلم لابد نتالم 
نلبس حداد
لازم نموت ؟؟؟
و لو ان كدبك 
مبقاش يغر 
لساك بتقول 
انا عاوزه حر 

#جوانيات

مش لازم دايما نبدأ من حيث انتهى الاخريين !!!
لان مش دايما بيكونوا هم الاصح 

عن بعض العادات اتحدث 
 

#جوانيات #فلسوفيات #اي كلام

تويتات مجمعه #ويكيبيديا_بس_بالعربي

هو في حد بيكتب على ويكيبيديا …
انا اقصد مثلا ان كل واحد دارس اجه يكتب عنها على ويكيبيديا بنفسه !!
و ده لان الفرق شاسع ما بين ويكيبيديا العربي و اي لغه تانيه O.o
فرق عبد الوهاب و شعبولا !!! 

ليه منعملش موقع زي ويكيبيديا … شايفه ان المدونين كتروا 
لو كل واحد شارك بمقال ليه علاقه بدراسته … هيكون عندنا كنوووز-بيديا

اهم حاجه ف الموقع ان يكون توثيق الصور و الفيديوهات و الحاجات اللي ممكن تندثر بعد 100 سنه !!! 

لان بصراحه عيب جدا لما ادور عن معلومات عن ابن خلدون … 
و ادور في ويكيبيديا بالانجليزي …

#اي كلام

غسيل مخ

لما نكتب تاريخنا ... اينعم مش هيدرس في المدارس .. لكن هتكون هي الحاجه اللي بتفكرنا لما يحصلنا غسيل مخ !!!

ساوثق !!

لانني لا اثق في المؤرخين .. فقد خذلوني اكثر من مره !!
ساوثق التاريخ .. تاريخي .. ما رايته بعيني 
ساوثق ما لن يراه اولادي .. 
ساوثق كتابات قد لا ترى الشمس مجددا .. 
ساوثق صوره و كتاب و شهاده عيان و فيديو 
ساوثق رائحه الغاز و حصى و ربما ذرات تراب من موقع الحادث
ساوثق سيرة اشخاص اغتيلوا معنويا و فعليا .. او سيغتالوا 
ساوثق اغنيات و اشعار نشات في ظروف مختلفه 
ساوثق فنون استحدثت .. 
ساوثق بعض النسمات
 التي ادخلت الي عالمنا 
ساوثق ان هناك ابطال و خونه … 
و فرسان هويتهم مجهوله و خسيس 
ساوثق ان لم يكن هناك قائد .. لم يكن هناك بطل 
ساوثق انها ليست حزبيه و لا مصنفه .. 
فكلهم قادة و كلهم ابطال 
ساوثق !!! 



لن اوثق الاكاذيب .. و الادعاءات .. لن اوثقك و لن اثق فيك !!



ساوثق طلاسم المستقبل .. 
و تعويذات من شانها تعيد البصر لفاقديه .. و الحقيقيه لمن اراد ان “يعرفها “

#جوانيات #فلسوفيات #اي كلام