ما بين القهاوي

الشيخ امام ..
مبيتكلمش عن الحبيبه
ديما بيتكلم عن العاشقين
ومتلاقيش سيرته
في الجرايد العلييوي
هتلقيها في ورقه ..
بحبر شاي القهاوي
و هتسمعه
في كلمتين في الغناوي
و هتحسه في نبره
كل واحد بيموت عشان هاوي
و تشم ريحته في نجم
و تشوف ضيه في عيون غاوي
واحد غاوي .. دخان مسيل
بس ابدا ما يعيش ذليل
واحد مهنته في الحياه
غلباوي …
و ما بين القهاوي و دوشه السكه
هتلاقي واحد ساب هم النهارده ..
و رجع زمااان .. على صوت امام
اهي حاجه تقويه على بكره
by : koka

عزيزي الصائم

الناس اللي عامله مؤدبه ... و ماسكه نفسها بالعافية عن قلة الذوق و الادب .. 
بس مبيقدروش كتير و اصلهم بيبان بسرعه :) 
و يرجع يقول اللهم اني صائم .... 

عزيزي الصائم ...
رب رمضان .. رب طول العام 
اعبد ربنا و خلي لسانك يصوم عشانه طول السنه ..
انت ما بتعبدش رمضان انت بتتعبد فيه :) 

koka

ورق الجرايد

من زمن الزمن

بنستخبى بورق التوت

و لما وقع الجدع

مطلعش عليه غير صوت

السلاح في ايده

و على الحدود مربوط

ورق الجرايد بكى

لكنه ما اشتكى

اتونس بالجدع

و باحضانه .. مبسوط

ورق ..

و عمر اتسرق 

و دم لونه 

… اتحرق

و سواد شربنا منه 

لحد الغرق

واللي ما داقش الرصاص

 ..اتفلق و اتخنق

و اللي اتحمق 

و اللي جاع للعداله 

و مبقاش في الرمق 

و اللي قال الظلم .. مر

من الزهق

مش بعيد يكون

اتشنق 

و اخر نقطه

في سم الغربه

انكتب عليها تتدلق

ما هو مش غريب الليلادي

هيبات في حضن امه

جوا ترابها 

مات .. و اتخلق 

koka 

رمضانكم حنين

1. اوعى تنسى الغايبين على السفره السنه دي 

   هتلاقي كرسي فاضي .. متشيلوش من مكانه … 
   حط الطبق في مكانه زي كل سنه .. و متنساش تهنيه برمضان 
   هيسمعك اكيد .. و على فكره بيهنيك .. و بيقولك 
   رمضان كريم و رب رمضان اكرم و اكرم .. و احنا في ضيافته السنه دي 
   يبقى اكيد رمضان غير 
   المجد للشهداء … كان نفسنا تبقوا معانا 
   
   كرسي فاضي .. او بعجل .. 
   او الشاش على عنيه .. 
   او الخرطوش اتونس بوجوده في رجليه و ايديه 
   
   رمضان هيكون كريم معاكم … اكرم و اعدل و احن ..
   رمضانكم حنين 
   
   #كوكايات